April the first is April Fool's Day. Watch out for tricks!
Papa et l'Paîsson d'Avri
Quand j'èrvînmes d'la boutique ès gâzettes à matîn, j'trouvis qu'Papa m'avait pendu eune coue au driéthe dé m'n annorâque.
“Oh Papa!” qué j'êcriyis.
“Paîsson d'Avri, man p'tit!” dit Papa auve un grand souôri. “Aniet, ch'est l'preunmyi d'Avri, lé jour des coues. Et né v'là eune coue pouor té.”
“Papa,” qué j'dis, “j'comprend bein pouortchi qu'lé preunmyi d'Avri est app'lé l'jour des coues, mais pouortchi qu'nou dit qu'eune farce est un paîsson d'Avri? Dé ioù qu'i' veinnent, les paîssons?”
“D'la mé, coumme dé raîson,” rêponnit Papa.
“Oh Papa!” qué j'r'êcriyis.
“Mais dame, ch'est vrai!” protestit Papa. “Ch'est eune vielle couôteunme des pêtcheurs. Ch'tait au c'menchement du mais d'Avri qu'les maît's des batchieaux soulaient prendre des nouvieaux pêtcheurs, d's apprentis, pouor la saîson – et bein seux qu'les anciens d'l'êtchipe à bord faithait d'lus mus pouor faithe des farces et jouer des triques pouor haler sus la gambe ès pouôrres innouothants.”
No comments:
Post a Comment