Monday 20 June 2011

Ma Motor-Bike - My motorbike

Ma Motor-Bike, eune poésie par GW de Carteret, liue par Don Dolbel à la Fête Nouormande 2011:
A Jèrriais poem by GW de Carteret, read by Don Dolbel at this year's Fête Nouormande:


Tch'est qui, dans djaix-neu chents vingt-iune,
Me couôti une petite fortune,
Et qu'a causé tant d'amiertume?
Ma motor-bike.

Tch'est qui m'avait mins an défi
De r'pather de la maîtrîsi
Et qui m'êlindgi dans vivyi?
Ma motor-bike.

Tch'est qui, quand je r'vimmes bouans amins
Et d'la manier j'avais apprins
M'encouothagi à couorre les c'mins?
Ma motor-bike.

Tch'est qui, à la héche des chapelles
Va s'stationner comme sentinelle
Et qu'êblouît toutes les hardelles?
Ma motor-bike.

Tch'est qu'a un couossin en drièthe,
Pour inviter à v'nin s'y assièthe,
Tchique jeune et jolie passagièthe?
Ma motor-bike.

Tch'est qu'avec ses fanfaronnades
Troublye le r'pos d'touos les malades.
Dépis Gouôrey à St. Brelade?
Ma motor-bike.

Tch'est qui, un jour à St. Cliément
Brûlait la route follâtrement,
Et fut la cause d'un accident?
Ma motor-bike.

Tch'est qu'ch'est qui m'lannedi d'vant la Cour
Et m'fit attraper vingt-huit jours
Pour l'affaithe de la Prumié Tour?
Ma motor-bike.

Tch'est qu'ch'est qui happi l'mors-ès-dents
Touos les piétons êparpillant
Et m'fliantchi contre un char-à-banc?
Ma motor-bike.

Tch'est qu'est siez Hunt le marchand d'chiques
Et qui n'mé jouôtha pas d'aut'es triques
Tch'est qu'ch'est qu'j'ai envié siez l'Vier Nique?
Ma motor-bike.

1 comment:

L'Office du Jèrriais said...

Texte modèrnîsé:

Ma Motor-Bike

Tch'est qui, dans dgiêx-neu chents vîngt-tch'ieune,
Mé couôtit eune pétite forteune,
Et qu'a causé tant d'amièrteunme?
Ma motor-bike.

Tch'est qui m'avait mîns au dêfi
Dé r'pather dé la maîtrîsi
Et tchi m'êlîndgit dans l'vivyi?
Ma motor-bike.

Tch'est qui, à la hèche des chapelles
Va s'stâtionner comme sentinelle
Et qu'êblouit toutes les hardelles?
Ma motor-bike.

Tch'est qu'avec ses fanfaronnades
Troubl'ye l'èrpos d'touos les malades.
Dépis Gouôrray à St. Brélade?
Ma motor-bike.

Tch'est qu'est siez Hunt lé marchand d'chiques
Et tchi n'mé jouôtha pas d'aut' triques?
Tch'est qu'ch'est qu'j'ai envié siez l'Vièr Nique?
Ma motor-bike.