Friday 30 December 2011

Janmais nou n'pouôrra oublier

L's années lus entré-sièvent mais i' n'lus entré-r'sembl'yent pon. Ch'est en tchi châque année a san catico d'bouôn et d'ma. J'dithons adgi à ch't' année-chîn au Tchu d'l'An - viyant qué jé n'pouôrrons pon lî dithe à bétôt ou à la préchaine. Et quand 2011 paqu'tha ses quat' quémînses en chîn ballots, y'en a tchi lî dithont bouonne dêbâte, et y'en a d'aut's tchi r'grett'tont l'pâssage d'eune année d'jouaie bordée d'souaie et d'bouonne mémouaithes.

2011 a 'té eune grande année partout not' Duché et y'a ieu des fêtes et des commémothâtions dans les capitales et les pays et les villages à seule fîn d'mèrtchi les mille chent ans d'la fondâtion d'la Nouormandie - assa, j'savons bein qué ch'tait raîque en l'an 933 qu'les Îles fûtent ajouôtées au Duché, mais chutte pétite tchestchion d'frontchiéthes n'avait pon avrôné les célébrâtions. L'annivèrsaithe dé 911 êtibotchit des livres - et la littéthatuthe dé Jèrri fut présentée dans lé livre "The Toad and the Donkey" et en partitchulyi, not' Maît' Wace prînt sa pliaiche d'hounneu dans des distchussions et des divèrtissements, coumme la sornette en portraits publiée à ches drein, dans les trais langues, entouor lé naûfrage du Blianc Navithe.

Pouor not' grande bordée des célébrâtions 911-2011, Saint Hélyi d'vînt la "capitale d'la langue Nouormande" au mais d'Juîn quand j'atchilyînmes la Fête Nouormande acanté nos couôsîns d'Dgèrnésy et d'la Grand' Tèrre. Tréjous i' faut prendre lé bouôn auve lé mauvais et y'avait tant d'fêtes tchultuthelles sus l'thème 911 partout la Nouormandie qué bein des dgaîngues et îndividus tch'éthaient voulu prendre part à Saint Hélyi 'taient trop embarrâssés siez ieux. Mais à la fîn v'là tch'est bein pouor la promotion d'not' tchultuthe. Et tout coumme nou-s'avait remplyi les rues et pliaiches d'la Ville dé dans'sie, chant'tie, costeunmes et fanne: Bouon Annivèrsaithe, Nouormandie!

Un aut' annivèrsaithe nos a tchée sus l'co: lé 23 d'Novembre 1951 à la Salle d'Agritchultuthe dans la Rue Mulcaster à Saint Hélyi, des gens lus rêunnîtent pouor former eune sociêté pouor êtudier et consèrver la langue Jèrriaise. V'là tchi 'tait la fondâtion d'L'Assembliée d'Jèrriais tch'a justément célébré san souaixantchième.

Auve des êlections ès Êtats et dans la Meunicipalité, y'a des pèrdants et des gângnants. Pouor les pèrdants, ch'est un r'tas, mais nou n'a janmais deux jouaies d'un betchet d'fronment.

2012 nos apportétha des calenges et d's avanches, mais "Janmais nou n'pouôrra oublier les jours dé ses jannes ans". Bouonne Année!

No comments: