Saturday 11 February 2012

Dictionary addenda

Tarangire Warzenschweinvéthot à véthues = warthog

George d'La Forge vîsitit l'Afrique en 1968. Ses împressions fûtent publiées sus la Gâzette du Sé les 18/10/1968, 24/10/1968, 31/10/1968, et 13/11/1968. Il êcrivit chennechîn l'26/10/1968 à Nairobi:
"Un autre annima tchi pathaît drôle est un couochon sauvage appelé "Warthog" en Angliais. J'n'ai pon peu dêcouvri tch'est qu'nou l'appelle en Français. Chein tch'est drôle à vaie est tch'i' chèrfouoille dans la tèrre atout san mûsé en gronnant sans arrêt comme san couôsîn domestique. Sans doute, il a l'mûsé bein pus gros et long, à l'êtchipollent du reste d'sa tête, qué san couôsîn qu'nou vait dans la cotte en Jèrri, et il a eune dent tchi corle en haut à châque côté d'sa bouoche. Ch'est d's annimaux tchi travâlent la tèrre en gronnant sans arrêt auve lus fanmiles de p'tits couochons tchi les suivent. I' sont peûtheux et r'gardent lé tou d'ieux tout en fouôillant, chein tchi n'est pon êtonnant quand nou considéthe tch'i' y'a des lions, des guepards et aut' bêtes sauvages tch'ont bouan appétit et tchi dgettent tréjous lus chance pour mangi les cheins tchi n'peuvent pon couôrre aussi vite comme ieux! Ch'est vrai qué l'couochon n'est pon lus viande favorite, mais nou n'sait janmais!"
Et pouor tout chenna, j'avons întroduit chutte bête à saie Afritchaine dans l's êcoles coumme "un véthot à véthues"

No comments: