Monday 11 February 2013

D'la viande dé j'va - Horsemeat



Elie êcrivit chutte poésie en Jèrriais tchi fut publiée dans Les Nouvelles Chroniques de Jersey l'4 dé Septembre 1915. Achteu qu'tout l'monde, à chein tch'i' pathaît, mangent du j'va, ch'èrest à propos.

This Jèrriais poem was written in 1915 by Elie (EJ Luce). It was a response to a proposal that horsemeat should be added to the wartime diet. Recent events have made it topical once more.

D'la Viande de j'va!

Dans les colonnes de la "Nouvelle Chronique"
J'lius, Mêcrédi, eune drôle dé suggestion,
Et ch'est séthieux - pas du tout ironique!
Mang'geons du j'va? - Là, né v'là la tchestchion.

Mangi du j'va! Né v'là chein qu'i' faut faithe,
Bouoilli longtemps eune bédache de bidet
Sus un gros feu, dans la pus grand' chaûdgiéthe,
Pouor san dînner! Tch'est qu'êprouv'tha d'ité?

Vraînment ch'est dû d'penser qu'la pouôrre Lîzette
Qu'nou-s'a cachi pour dévièrs vîngt-chînq ans,
Es'sa bétôt, en steak sus vot' assiette.
Ch'est trop d'mander à des hommes dé bouan sens.

Quand nou s'entr'dit, tchiquefais, l'estonma viède:
"Je mang'geais bein un j'va, la graie au co"
I' n'faut pas craithe qu'i' n'y'a pon d'aut' èrmiède
Pouor l'appétit, qué d'faithe un té fricot.

J'aime acouo mus teurtre l'co à mes glinnes,
Faithe dé la soupe auvec du lard salé,
Et êtchuiver la derniéthe d'mes lapinnes.
Mais jé n'veurs pas mangi man vièr bidet.

No comments: