Wednesday 25 February 2015

Bétôt!

Né v'chîn l'texte d'aniet d'not' auteu du mais, Henry Luce Manuel:

Here's today's text by our author of the month, Henry Luce Manuel:

Bétôt!

I' m'sembl' que temps incomptable avant d'naitre,
J'étais.
Sans vie, ou forme, ou sens, ou être
Viyiais
Veill' du c'menchment, - bu' d'espace, - et néant.
Oyais
L'Incréai, quoiq' sans voix, chantant -
"Bétôt!"

I' m'sembl' que l'Intouchabl' d'un bond print chair.
Je vis
Etelle et Homme, et Terre et Mer;
Et dis
Ah! J'SIS, enfin! - Pensée et Forche et Queur...
Je sis!
Science de Tout! J'AIRAI ta lueur -
"Bétôt!"

O Feu-follet! Q'sage appell' Vanité! -
Blianchi,
Coumm' querbon par fliamb' dévoré; -
Vielli,
T'manquiant! - Ah, i' s'fait bein tard quand j'entends
Un cri:
"Pour tout savé, autr'vie attends..."
"Bétôt!"

I' m'sembl' coumme heure apprèch' de m'renvoler
Au d'là,
J'entends Esprits me murmurer:
" Saira,
Mus qu'Archang' mêm', La Science Infinie,
Chtilà
Qu'arriv', à travers mortell' vie -
"BÉTÔT!"

No comments: