Monday 23 March 2015

1964: Les Hommes et les Femmes - Men and Women

Eune articl'ye dé 1964 dé Douard Lé Bro (ieune d'ses dreines):

An article from 1964 by Edward Le Brocq (one of his last):

Les Hommes et les Femmes
à Portînfé, Saint Ou,
Mardi au sé.

Moussieu l'Editeu,

J'n'sais pas trop où qu'menchi à ces sé, car i' m'semblye que man pouôre vièr chervé pense à une doûzaine de choses au même temps. La Merreinne maintchein que ch'est l'înfirmité de l'âge, et ch'est p't'être vrai, mais avec chonna, j'trouve drôle qu'ou n'pathaît pas souffri d'la même maladie. Ou dit que les femmes ont tchiquechose que l's hommes n'ont pas, et ch'est seux et certain qu'ch'est vrai. Tchêsqu'ous en dites, Moussieu? J'pense bein qu'ou dithez qu'l's hommes ont tchiquechose étout que les femmes n'ont pas, et nou n's'en va pas vos contredithe.

Parmi les membres d'la Sociêté Rouoyale y'en a, n'ou-s-entend, en faveur de l'inséminâation artificielle. Nou comprendrait chonna mûs s'i' n'y avait pas d'boeux dans l'Ile ou s'i' n'valaient pas grand chose, mais allez dithe à un fermyi que san boeu n'vaut rein, et ous êtes prêsque seux d'attraper une raide cliamûse. I' s'peut que j'n'avons pas un "Golden Lad" ou un "Golden Maid's Prince" mais l'sang de chais grands boeux est dans les veines d'lûs d'scendants et d'scendantes. Quant au lait, y'en a tchi voudraient adopter le système angliais, étant satisfaits que l'lait d'veindrait d'miyeu marchi. Eh bein, Moussieu, nou dit qu'nou dév'thait êprouver toutes choses une fais, et i' vaudrait p't'être la peine d'êprouver chettechîn, mais la Merrienne n'est pas en faveur, car ou dit que ch'est un péché de forchi une vaque à donner pûs d'lait que la natuthe y'a êpergni.

Comment raisonner avec une femme comme chonna?

La Batalle de Flieurs a l'air d'ête une extra grande occâsion ch't année, car chînq des pâraisses ont décidé d'montrer des vétuthes décorées, et ch'est pûs qu'nou n'en avait veu d'vant. Saint Ou n'est pas ocquo du nombre, mais la pâraisse n'peut pas tréjous être preunmièthe partout.

Nou-s-en entend de toutes les sortes au sujet d'la préchaine saison d'patates, mais nou n'peut pas sinon vaie l'air d'appréhension parmi la mâjorité de fermiers et ch'n'est pas êtonnant. Il est à espéther tch'i' pouôrront au mains payi lûs dettes et lûs dêpenses.

Un électeur d'la Trin'té que j'rencontris samedi, m'asseûthit que n'y éthait pas pûs d'une dém'ié doûzaine dé vouaix entre Charles Cabot et Edgar Mouthant, et qu'au moment la mâjorité peut aller à yun ou à l'aute. J'ai ouï d'un brave électeur tch'i' s'en va voter pour les deux, mais je n'sais pas si ch'est vrai. Etant un Trin'tais, ch'là s'pouorrait bein.

Ph'lip

7/3/1964


No comments: