Friday 13 March 2015

Eune Deuxième Chance

Né v'chîn l'texte d'aniet d'not' auteu du mais, Amelia Perchard:

Here's today's text by our author of the month, Amelia Perchard:

Eune Deuxième Chance
J'mé rassouveins quand j'tais filliette,
Dé man grand-péthe; jé l'vai à ch't heu!
Sa vouaix trantchile, san doux souôri,
Et tréjous dé si bouonne humeu ;
Coumment qué dînmanche et sus s'maine,
Solé ou plyie, i' 'tait tout l'temps
Drait coumme un bouais, auv' la tête nue
Ses g'veux touos bliancs et èrlisants.

Un jour quand i' m'print sus ses genouors,
J'lî d'mandis, coumme eune moussette f'thait,
Dé m'dithe la raison qué ses g'veux
Étaient dé-même, bliancs coumme eune né.
I' m'rêponnit bein séthieusement
Et d'eune vouaix toute êmutionnée :
"Pour mé rassouv'nin d'eune promêsse
Qué j'fis, ma p'tite, y'a bein d's années­ -

N'oublyie janmais qué dans les cieux
Y'a un Bouôn Dgieu qui souongne dé nous,
Et tâche dé faithe tréjous san d'si,
Pour être un bouon exemplye à tous".
Sus chla i' m'dit d'm'en aller jouer,
Et, mousse qué j'tais bein seux j'filis
Né r'pensant dgéthe ès mots d'avis,
Ni à chein qu'Papa m'avait dit.

Mais à m'suthe qué j'vîns à grandi,
J' c'menchis à r'counnaître sa bouonté;
Et comprendre pourtchi qu' par les gens
Il 'tait aimé et respecté.
Les êfants, les bêtes et l's ouaîsieaux
Avaient un bouon anmîn en li.
Tous au bésoin 'taient seux dé s'n aide,
Fûssent gratteux droutes ou grand fèrmyi.

I' vêtchut, jusqu'à nonante ans
Dévant qu'la vouaix d'san Créateur,
En rêcompense pour ses sèrvices
L'app'lit pour être auv' li ailleurs.
Ch'tait dans l'fond d'l'hivé qu'i' s'en fut,
Paisibliément et sans dgèrni;
Et lé temps sombre et si trantchile
Sembliait étout être en deu d'li !

Duthant l'sèrvice à s'n entèrrement,
Coumme un mithacl'ye l'solé s'môtrit,
Travers d'la f'nêtre en d'ssus d'l'autel
Jusqu'à sus san côffre i' lîsit;
Et ses rayons nou-s-éthait dit
Lisant d'dans l'églyise jusqu'ès nouages,
Étaient un c'mîn pour s'n âme à prendre,
Sauf et sans gêne sus san drein viage.

"Ch'est seux et cèrtain" dit ma méthe,
Qu'i' méthite bein sa rêcompense ;
Mais tout l'monde sus chutte tèrre n'ont pon,
Coumme li, ma fille, eune deuxième chance.
Êcoute qué j'té raconte l'histouaithe,
D'la chance qué l'Bouôn Dgieu li'accordit
Dans sa bouonté; pour la promêsse
D'changi sa vie et d'èrpenti ".

J'êcoutis toute êmerveillie
L'histouaithe êtrange et sans pathelle
Dé man grand-péthe dans sa jannesse -
Coléthe, incrédule et cruel -
Coumment qu'i' m'nait eune vie d'mînséthe
À sa femme et ses pouôrres êfants,
Auv' juthements, cliamuses et coup d'pids;
Les cachant tréjous en travas.

San janne chéva, né coumme péché,
Du nom d' "Satan", était caumme li!
Un dgiâbl'ye, né counnaîssant pas d'maître,
Têtouongne, remplyi dé mauvaîtchi!
Il existait entre houmme et j'va
Eune vraie dgèrre pour dominnâtion,
Qui fit quâsi eune tragédie
Quand l' j'va s'mînt maitre d'la situâtion.

Il avait mîns eune chèrge d'vrai
Sus l'fôssé au haut d'un côti,
Quand, prînse d'eune tchînte chutte néthe tchéthouongne,
Hîngnant, èrfusit dé bouogi !
L'houmme dans l'hèrnais, fouet à la main
Sa coléthe montant auv' châque lache,
Calfaîtait l' j'va sus dos et flianc
Dêtèrminné dé l'mettre en marche.

D'un coup lé j'va coumme possédé,
Prînt l'mors ès dents et embèrtchit
Par sus l'fôssé, traînant l'hèrnais
Au pliein gallop avaû l'côti ;
Et là dans l'bas, sans hésiter,
Par-dessus l'bord i' s'en fûtent tous,
Houmme, hèrnais, j'va, pour être fliantchis
Avaû les banques dans l'pré en d'ssous!

Sa fîn si près fit man grand-péthe
Penser à chein qu'il avait 'té ;
Pour ses péchés, sa mauvaîtchi,
L's années pèrdues, il eut èrgret.
I' lî semblyit ouï eune vouaix dithe
"Daniel, Daniel, faut èrpenti,
Eune deuxième chance t'est accordée
Dé m'honorer et dé m'sèrvi”.

A cause d'ses vices "Satan" 'tait mort;
Mais l'houmme par un coup d'grâce vivait!
Et d'eune vouaix faillie et toute bâsse,
"Oui, oui, j'promets", i' répétait.
Ses g'veux si nièrs, à ch't heu 'taient bliancs!
Sîngne d'en haut, pour lé rassouv'nîn
D'eune promêsse faite, d'eune deuxième chance,
Jour auprès jour pour tout s'n av'nîn.

Fidèle à fîn à sa pathole,
Siêsant l' c'mîn qu'il eut d'înditchi,
I' jouit d'sa rêcompense ès cieux
Auv' d'autres coumme li qu'ont bein sèrvi;
Mais j'pense souvent ès mots à m'mée,
Qué tous eune deuxième chance n'ont pon;
Dévthait-i' don être nécessaithe
Dé m'nichi l'houmme pour qu'i' s'sait bouon ?

Lé Bouôn Dgieu nos accorde eune chance
À tous dé m'ner eune vie chrêtchienne;
Ministres dans églyises et chapelles
Nos prêchent sa bouonté d' s'maine en s'maine.
Ch'est à nous d'en prendre avantage
Et d'méthiter notre existence.
Lé jour veindra qu'i' s'sa trop tard,
Dé d'sither pour eune deuxième chance!

No comments: