Tuesday 28 July 2015

1912: How Piteur buys a motor-car

Cité de l’Automobile Barré 2How Piteur buys a motor-car

Au r'chu d'la lettre du Bos me disant qui l'y sembliait qu'j'y mettais pus d'temps qu'y n'faut a accaté s'n'ielle, et que je f'thais bin de m'despéchi a r'vené tches qu'en 'tait siez nous; qu'il avait oui dithe qu'Lonore avait 'té vevue apprenrendre a naji dans l'Pool de l'Esplianade, et qu'Laizé avait emprunté djix ch'lings a yun des 'reporters' - quand je r'chut chutte lettre là, et qu'j'eut compté les sous qui m'restaient, j'mé décidi qui falait s'moustré à rentré en Jerri.

Ch'est dommage! Nous est djantrement bin ichin, et d'pis que l'brit a couothu que ch'est a mé l'Morning News (j'n'pouorais dithe tchès qu'a mins chu bri la par les q'mins, mais les gens l'craient, et ch'n'est pon la peine de les contrédithe) j'sis tout a fait "in the swim" coumme y disent en Angliais. J'dine (a 7 heuthes, respé d'la compagnie) siez des docteur; j'desjeune (a 11 heuthes) siez d's'avocats. Y'a un clianquaillyi r'tithé des affaithes qui m'a emné faithe un tou en rade dans sa yacht, et j'sis pour allé d'main en 'moto-car' a un pic-nic yiou qu'y'étha un Colonel et sa Madame. J'ai quazi romblié pour tchi qué j'sis v'nu ichin.

En paslant 'd'motor-car', j'eut yeunnes des pus belles proumnades que nou piesse avé, l'aut'jour. J'tais a r'gardé eunne collection d'cars dans la boutique d'un marchand quand l'marchand mé d'mandi si j'avais dans l'idée d'en accaté y'un. Pus ou mains, j'lis respounni; mais faut qui rouolle bin et qu'les 'spring' s'saient ben doux, qu'les couossins s'saient en v'lous, et qui y'ait eunne grande ozenne pour empechi l'ponsi d'vos aveuglyi. Ch'est pour dounné a ma fille - pour s'proumné avec sus l'Espliannade, siez nous, pour que nou s'destouonne quand ou passe. J'ai votre affaithe, qui dit; n'en v'chin un bieau bliu, qu'a 'té fait pour eune Contesse, mais ou vint justément d'mouothi d'eunne suée d'fret dans les talons. J'vos l'bâdrait pour siex chents louis, avec eunne pathe de lanternes par dessus l'marchi! Ch'tait un bieau moto - quazi aussi bé que l'sien que l'Counnéstabye Pinné mint a l'amende l'aut'jour, et j'dit que si voulait rabattre oquo tchinze shellings, je l'prennais, mais qué, d'vant que d'péyi, et coumme y s'adounnait que j'n'avais pas justement la soumme sus mé (y'm mantchait ching chents nonnante sept louais) j'éthais a èscrithe a man bantchi en Jerri qu'il eusse a m'envié des sous et qu'v'la tchi prendrait au mains eunne semaine.

V'la tchi fut conv'nu d'même, et en attendant qu'les sous viennent, j'soumes a èsprouvé l'moto touos les jours pour vaie si rouolle bin et si les 'spring' sont doux assez pour m'n'èsfant. J'faisons jusqu'à des chent milles par jour, et si s'adounne qué j'soummes liein d'ichin sus l'heuthe du dîné, j'dînons là ou-ès qu'nou s'trouve. Ch'est l'marchand qui paie partout et met bas touos les siers les despenses a man compte - y'en a achteu pour siex chents onze louis et tchiq' sous - il a promint d'rabattre es sous. J'setléthai tout cheunna d'un coup - coumme j'y explique - quand man bantchi m'étha envié mes sous.

J'm'attends a poué resté ichin tchiq jours de pus que je n'm'attendais. D'pis qu'ch'est l'marchand d'motos qui paies mes dînieaux, j'm'appercheut qu'les sous du Bos duth'thont bin oquo huit jours. J'sis a jé-m'sai si j'n'ithais pon faithe sembliant de voulé accaté un navithe - y'en a tout plien ichin - chose seuthe que j'trouv-rais moyen de m'faithe nouori oquo eunne atre s'maine par chu marchand là.... en attendant qu'mes sous vinnent de Jerri.

Yours truly,
Piteur Pain

Morning News 6/6/1912

No comments: