Tuesday 28 July 2015

1961: La Grève dé Lé

L'Assembliée d'Jèrriais
Rêunion à la Grève de Lecq
La rêunion mensuelle eut lieu l'28 dé juillet à la Grève de Lecq, et passant 90 membres lus y rêunitent.

Les rapports du mais d'mai et du service annuel fûdrent lius et approuvés et neuf nouvieaux membres futent êlus.

La mé 'tait haute et ch'tait magnifique dé marchi sus l'talustre pour aller d'l'aut' bord de la grève pour ouï un bein înterêssant discours par Moussieu Ph. Ahier, B. ès S.

La Grève de Lecq

La Grève de Lecq est sus deux pâraisses. Le côté d'la cauchie est su St Ouën, et l'autre est sus Ste Mathie, ch'est l'cané du moulîn qui les s'pathe. ch'tait amusant d'ouù l's histouaithes du temps passé, qui disent comment qu'les gens crouaîthaient d'un bord dé la grève à l'aut' pour lus êcapper d'payer lus taxes. une histouaithe dit qu'un baté qui fut naufragi, fut traîné d'un but d'la baie à l'aut' pour n'aver pas a payer la partie d'20 "livres" qui 'tait r'cliâmé par la Couronne. I' pathaît qu'en 1685 y avait deux "maisons d'garde" iune dé chaque côté d'la baie - dé tchi qui y en retait acouo des muthailles souos l'Câté quand l's All'mands vîndrent en Jerri.

Lé Vièr Moulîn

Lé vièr moulîn, qui 'tait en allant en 1363, continuit à être fait servi à moudre du grain jusqu'en 1929, ayant changi d'mains bein des fais dans l'entretemps.

La Cauchie

Ch'est bein întérêssant d'saver étou qué en 1871 l's Etats pâssîtent un Acte qu'eune cauchie fusse bâtie et qu'ou couot'tait £8,000! Ch'en fut pas justement assez, car deux ans auprès un aut' £5,000 futent accordés. Y eut eune quarantaine dé machons d'empliyés, souos la direction du grand-péthe à iune des membres de L'Assembliée.

Auprès l'discours fini les gens erfilîdrent au café à Mme. Carré pour eune bouochie à mangi et eune tassée d'thée.

1961

No comments: