Auprès mînniet eune séraine vînt m'séduithe

Né v'chîn la poésie d'aniet, tch'appathaît ichîn pouor la preunmié fais, d'not' auteu du mais, Geraint Jennings:

Here's today's previously unpublished poem by our author of the month, Geraint Jennings:

Auprès mînniet eune séraine vînt m'séduithe;
ou nagit dans man liet, eune forte mathée
à m'ligouaîsi dé landgi et d'vandgîthe;
sa coue, eune louême tchi boulait contré mé.

La séraine vînt m'séduithe auprès mînniet;
ou m'pêtchit parmi m's ouothilièrs mouoillis;
j'touônnis, un co dêhalé à man gré,
pêtchi la vlique, vaie flieuthi l'con d'rotchi.

Pouor m'séduithe, eune séraine dé mînniet vînt,
ses êcrèdes lithantes, toute parfeunmée d'vrai;
man corps d'auve lé sien, j'êcliatchînmes du r'sîn,
lavés dans ses embraiches et l'cliapotais.

Ou vînt pouor m'séduithe la niet, ma séraine,
et pouor m'êcaler d's hîtres, haler mes pèrles;
ses êcales sont à mé, et ma couette s'sa la sienne...
Auprès la mathée, v'là nos tailes tchi fèrlent.