Happy holiday to our French friends!
Les Français n'changent pon fort. I' trempent acouo lus pain dans lus café au matîn, et i' craient acouo tch'i' faut baithe du blianc vîn pour "mieux goûter" cèrtaines choses à mangi et du rouoge pour d'aut' choses. I' trouvent tréjous qu'ch'est drôle qué j'peux mangi sans baithe en mème temps, et qué j'peux apprécier l'fronmage sans baithe un cèrtain vîn pour li donner du goût. Et i' pâssent des heuthes assis dans un café à baithe eune fais et r'garder l'monde pâsser dans la rue - la mème rue tch'il' ont veu pour des années. Et quand i' lus entre-pâlent ch'est à tue-tête, comme s'il' 'taient mârris!
'Vas-y s'tu veur' ou raiponnit, 'mais quant à mé j'n'ai jamais aimer les Francais d'pis la bordée, y'a bein d's années quand j'fûmes à Saint Ou, et qu'tu r'vint à l'hotel à quatre heuthes du matin, explitchant qué tu'avais perdu tan c'min, et qu'un Chentnyi, un Surveillant et trais Officiérs du Connétablye avaient fait la même chose. J'n'ai jamais 'tait en France dépis, et j'n'm'y'en vais pas àch'teu.'
J'men vais en France, l'Président d'La République s'en vint à St.-Malo Mardi tchi vint, et mes paraissiens m'ont dit qu'chest man d'vé, coumme principa et ancien Chantnyi, d'allé jusqu'a là, r'présenté l'île, d'pis qu'Moussieu Baudains n'peut y'allé, et tchi n'ya qu'li et mé en Jerri accuotumés a viagi parmi l'grand monde.
Nos v'la don à Dinard. La preumié chose a faithe, que j'dit a Sam, ch'est d'prendre du lest d'vant que d'gabathé pus lien; désjeunons. J'entrimes don dans un hotel, et coumme il 'tait oquo trop bouonne heuthe pour le r'pas ordinaithe, je c'mandi a mangi pour deux; eunne omlette au lard, eunne steak ov des pommes de terre, des ledjeummes, du fromage, tchiq mio d'fruit, deux boutelles de vin, et du café, pousse café, et eunne finne litcheu pour rainchi. Tandi qu'ils 'taient a prépathé cheunna, j'nos assiévimes sus un banc a r'gardé passé l'monde.
Mais tchi belle ville que Nîce! J'fûmes là un jour et d'mi, et oquo Alphonse prétend qu'y'à pus d'eunne chose que jé n'vîmes pon. Y'a pus d'chent mille habitants à Nice (sans compté l's'Angliais qui viennent pour tithé des pigeons) et j'eûmes le temps d'allé vaie la maison où-ès qu'Garibaldi avait 'té né - eunne faillie sorte d'maison. Nous ethait bin resté oquo un d'miè jour là - pour dormi, disaient les femmes - mais pas moyen.
"Filons sur Toulon pour voir les navires-de-guerre" qu'dit Alphonse. J'viagîmes de niet, coumme d'amor (v'la tchi sauve des frais d'hôtel) et nos y v'là! Justement y'avait des régates chu jour là.
Eh bein, bouannes gens, m'èrvélà en Jèrri pour deux-s'trais jours auprès un séjour dé trais s'maines en France. Ch'tait m'n întention d'y rester jusqu'à la fîn du mais, mais en r'vénant d'Charente en compangnie d'mes anmîns l'Sieur Edgar John Rive et sa charmante danmes, tch'avaient pâssé trais s'maines en Espangne et tch'avaient ieu la bouanté dé m'donner un pâssage, allant et v'nant d'St. Mâlo à Aigre, en Charente, j'arrivînmes à St. Mâlo hièr au sé en temps pour aborder lé hydroglisseur à siex heuthes et d'mie pour Jèrri, et j'fus si tenté d'm'en r'vénîn jusqu'en Jèrri auve ieux, qué m'y v'chîn!
No comments:
Post a Comment