Thursday 3 December 2015

La Complyiènte dé l'oncle Tom

Né v'chîn l'texte d'aniet d'not' auteu du mais, Jean Picot (J.P.):

Here's today's text by our author of the month, Jean Picot (J.P.):

La Complyiènte dé l'oncle Tom
L'aut' jour, en ville, jé trouvi l'oncle Tom:
- Ch'était l'y, ou savez, qu'eût ses braies raccourchies, -
Jé pâslîmes du temps et dé sa bouann'femme,
Et l'ev'chin la complyiènte qué lé vieux mé fit:-

- Pour nous, les viers, l'hivè vein ov' toute sa minsère:
Suèes d'frais, mà dans l'os, et la roupie au nèz,
Mais dé touôs les mâux, lé chein qué j'trouve lé pière,
Ch'est dé m'couôchi touôs les siers ov' les pi'ds g'lès!

J'ai biaû les cliutter dans l'âtre, y n'peuvent pon rèscaûffer,
Jé n'gagne rein dé les frotter ov' dé l'iaû d'vie camphrèe,
Man pouôre vier sang né peut pous circhuler,
Et jé m'coule dans man lièt ov mes deux pi'ds g'lès.

Pour la bouann'femme, ou s'èscarte tréjous bein lyien d'mé -
Et sé garde dé san bord, caûd'ment arroûnnèe -
Et ou groûmache et grond - j'en ai a èscouter
Si par mèsgarde jé l'attouche ov' mes pouôrres pi'ds g'lès!

J'ai ouï qu'un vier Moussieu pour èscaûffer sa niche
Y'iènviait à s'y couôchi au qu'mench'ment d'la sairèe,
Unn' bouann' grosse hardelle - ch'était unn' Irish -
Mé, j'n'ai qué la bouann'femme, et mes pi'ds restent g'lès -

Y f'rait bon dé l'y pâsler dé prendre lé pâs l'avant
Pour rèscauffer ma plièche, l'yi qu'est si entêtèe!
Y'ièrait bristo' pour seûre, et don lé millyieu plian
Ch'est pour mé d'endurer tout: maîme mes pi'ds g'lès!

Ou mé dites qu'y y'ià bein des r'mièdes pour chounna, -
Voire d'jià, j'en esprouvè étout par bordèes:
Pâslèz-en à ma femme, bein vite ou vos contera
L'histhouaire dé la jougue et dé mes pi'ds g'lès.

J'avais remplyi d'jiaue caude unn' jougue dé deux pots
Dans du fliannè j'l'avais bein enflyiubèe,
Et souôs les couèrtures j'y cauffais me's ergots,
En mé disant tout fi: - "J'n'érait pus les pi'ds g'lès!"

Mais la jougue dèsbouchi - ché fut minsère et malheu'!
La bouann'femme et mé j'mantchîmes bein d'être nyiès;
Et ou mé dît en s'dèspliaûtchant hors dé dans la mûcreu':
"La peste sait dé tes r'mièdes pour tes viers pi'ds g'lès!"

Lé matin y fallut tout sitchi: Jeann'ton en 'tait folle,
Dé vais couèrtures et blaînket, et lincheurs trempès;
Jusqu'à san liètt d'pliumme, et lé bâs dé sa qu'minsolle.
Ou comptait tout ruinè à caûse dé mes pi'ds g'lès!

Les vaîsins ont ouï pâsler dé notre èscalifiâs,
Et y'l'en font pardingue, dé fichues riselèes;
Mais jé fais tréjoûs la minne dé n'les entendre pas
Quand y bagoulent dé jouque, et pâslent dé pi'ds g'lès!

Enfin j'ai ouï dire qu'y vendent des caûches dans la rue d'Drière,
Et y faût qué j'en' achate, des... coumm'est qu'ou les noummèz?
Ah! des night socq - y'n'y'ià pon d'soin si sont chières
Pourvu qu'aû lièt y'm r'éscaûffent quand j'ai les pi'ds g'lès!

No comments: