Wednesday 23 December 2015

Man Chapé d'paille

Né v'chîn l'texte d'aniet d'not' auteu du mais, Jean Picot (J.P.):

Here's today's text by our author of the month, Jean Picot (J.P.):

Man Chapé d'paille
Là, reste pendu à tan cliou,
Drière la porte, ou contre muraille,
Reste pendu, n'yià pas d'soin yious,
Tu n'sert dé rein, man chapé d'paille.
En t'achatant j'fis un pouôre barguin,
Unn' pièche d'êtchu raide bein fliambèe,
Car si j'té mets tchiq' biaû matin,
I tchait d'la p'yie toute l'arlévèe!

Ch'est té qui fais peûx au solèt,
Jé n'ai qu'à t'mettre pour qui s'en r'aille,
Tout l'mais d'Juin et dans Juillèt
Tu'as 'tait farçeux, man chapé d'paille.
Août est don v'nu - maîme coummerce -
A matin tentè par lé biau temps
J't'ai deshallè - ach'teu il 'en verse:
Tu r'as distorbè les êlèments!

Ergarde, j't'en prie, chein qué tu'as fait,
V'là d'l'ôrage, du vent, et squâlle sûs squâlle -
Dis-mé, est-che la du temps d'Etè,
Ou pour porter un chapé d'paille?
Nennin, ma fingre, j'm'en vais t'sèrrer
Hors dé la vaie, man trouble-fête,
Si dans l'mais d'Août i faût s'proumm'ner
Ov un Saû-Westeur sus la tête!

Là, té r'véla pendu - eh bein, reste 's'y -
Qué jé faîgnionne ou qué j'travaille,
Solèt ou pas, jé n'veurs pon risqui
A té r'touchi, man chapé d'paille,
Enfin, reste là - j'ai idèe d'attendre
Qué l'temps sé r'mette, pour seûre, sus l'bé,
Et si y'ià unn' chance dé té r'dèspendre,
Ché s'ra p't'être bein, dans les temps d'Noué!

No comments: